பெருநாள் தின செய்தி

இன்று முஸ்லிம்கள் நோன்புப் பெருநாளைக் கொண்டாடுகிறார்கள், பெருநாள் என்பது முஸ்லிம்களைப் பொறுத்தவரையில் கொண்டாட்டத்திற்குரிய ஒரு தினம் என்பது போல் அது அவர்களது தனித்துவத்தைப் பறைசாற்றும் ஒரு நிகழ்வுமாகும். நபியவர்கள் மதீனாவுக்கு வந்த போது,  மதீனா மக்கள் பாரம்பரியமாக செய்து வந்த சில கொண்டாட்டங்களைத் தடைசெய்ததுடன் அதற்குப் பகரமாக இருபெருநாட்களை அறிமுகம் செய்தார்கள். இந்த நிகழ்வு முஸ்லிம்களது வாழ்வு தனித்துவமானது என்பதை வலியுறுத்தி நிற்கிறது.

முஸ்லிம்களது தனித்துவம் என்பது நம்பிக்கை,  சிந்தனை, நடத்தை,  மனோபாங்கு,  பண்பாடு,  கலாச்சாரம் என பல்வேறு பக்கங்களில் பிரதிபளிக்கக் கூடிய ஒரு அம்சமாகும். அந்த வகையில் இந்த அனைத்துப் பக்கங்களிலும் இஸ்லாமிய வாழ்வின் தனித்துவம் தமது நடத்தையில் பிரதிபளிக்க வேண்டும் என்பதுடன்,  அந்த வாழ்வு மனித சமூகத்திற்கு ஒரு சிறந்த மாதிரியாக அமைய வேண்டும் என்பதே பெருநாள் தினம் எங்கள் காதுகளில் சொல்லும் செய்தியாகும்.

அல்லாஹ்தஆலா இவ்வாறு சொல்கிறான்: ' நீங்கள் மிகச் சிறந்த சமூகத்தினர், மனித சமூகத்திற்காகவே நீங்கள் அனுப்பப்பட்டுள்ளீர்கள், நீங்கள் நன்மையை ஏவுகிறீர்கள் தீமையை தடுக்கிறீர்கள்,  அல்லாஹ்வை ஈமான் கொள்கின்றீர்கள்"- ஆலஇமரான் - 110.

முஸ்லிம்கள் தனித்துவமான ஒரு சமூகம் என்பதையும் அந்த தனித்தன்மை நன்மையை ஏவுவதிலும் தீமையைத் தடுப்பதிலும் அல்லாஹ்வை ஈமான் கொள்வதிலும் பிரதிபளிப்பதாக இந்த வசனம் விளங்கப்படுத்துகிறது.

சகோதர சகோதரிகளே,  இன்று உலகில் நீதியும் சுதந்திரமும் பகிரங்கமாய் பறிக்கப்படும் ஒரு சூழலை அவதானிக்கின்றோம், நீதியை நிலைநாட்டுதலும் சுதந்திரத்தை உத்தரவாதப்படுத்தலும் முஸ்லிம் சமூகத்தின் உன்னதமான தனித்தன்மைகளில் ஒன்றாகும். இதனைத்தான் ருப்ஆ இப்னு ஆமிர் றழி அவர்கள் இவ்வாறு கூறினார்கள்: சில மனிதர்கள் இன்னும் சில மனிதர்களுக்கு அடிமைப்படும் நிலையில் இருந்து அவர்களை மீட்டு அல்லாஹ்வுக்கு மாத்திரம் அடிமையானவர்களாக மாற்றுவதற்காகவே நாங்கள் அனுப்பப்பட்டிருக்கின்றோம்,  என்றார்கள்.

இன்று எமது நாட்டிலும் பல்வேறு தீவர சக்திகள் மக்களில் ஒரு தரப்பினரை அடிமைப்படுத்தப்படுவதற்கான முயற்சியை செய்து கொண்டிருக்கிறார்கள். அந்த மக்களது உரிமைகள் பறிக்கப்படுகின்றன, சுதந்திரம் மறுக்கப்படுகின்றது.

மற்றோர் புறத்தில் உலகின் பல்வேறு நாடுகளில் நீதியும் சுதந்திரமும் மறுக்கப்படுகின்ற நிலையைக் காண்கிறோம், எகிப்தின் தற்போதை நிலை இவ்விடயத்தில் முதன்மையானதாகத் தெரிகிறது,  மாத்திரமன்றி சிரியாவிலும் மியன்மாரிலும் பலஸ்தீனிலும் இந்த அவலங்கள் தொடர் கதையாகவே இருக்கின்றன. சுதந்திரக் காற்றை சுவாசிக்கத் தொடங்கிய டியூனிஷியா,  லிபியா போன்ற நாடுகளிலும் மீண்டும் அதனைப் பறித்து விடுவதற்கான முயற்சிகள் நடைபெறுகின்றன.

இந்த அநீதிகளுக்கு எதிராகக் குரல் கொடுப்பதும், நேரடியாகவும் மானசீகமாகவும் பாதிக்கப்பட்டோருடன் கைகோர்ப்பதும் நிச்சயமாக எமது தனித்துவக் கடமையாகும் என்பதை இவ்வருட நோன்புப் பெருநாள் தின செய்தியாக உங்களுடன் பரிமாறிக் கொள்வதில் சந்தோசமடைகிறோம். உங்கள் அனைவருக்கும் எமது நோன்புப் பெருநாள் வாழ்த்துக்கள்.

எகிப்திய சூழல் குறித்த ஓர் அவதானம்

கலாநிதி முஹம்மத் முர்ஸிக்கு எதிரான இராணுவப் புரட்சி கடந்த ஜூலை 03ம் திகதி அரங்கேறியபோது, இஃவான்கள் ஒரு உறுதியான நிலைப்பாட்டில் இருந்தார்கள். சட்டபூர்வமான ஜனாதிபதியே எமக்கு வேண்டும். இந்த அநியாயமான புரட்சியை ஒருபோதும் அங்கீகரிக்க மாட்டோம். இந்த அநியாயக்காரர்களுடன் எவ்விதமான சமரஸமும் கிடையாது. மக்கள் போராட்டம் தொடரும். அதற்காக என்ன விலை கொடுக்கவும் தயாராக இருக்கிறோம் என்பதில் அவர்கள் மிகவும் உறுதியாகவும் தெளிவாகவும் இருந்தார்கள்.

இந்த நிலைப்பாட்டை மேலோட்டமாகப் பார்க்கும் போது, அல்-இஃவானுல் முஸ்லிமூன் என்ற இயக்கத்தின் எதிர்காலம் எகிப்தினுள் எவ்வாறு அமையப் போகிறது என்ற ஒரு அச்சம் நிச்சயமாக அதனை நேசிக்கின்ற எவருக்கும் ஏற்படும். ஆரம்பத்தில் எனக்கும் கொஞ்சம் இந்த அச்சம்  ஏற்படத்தான் செய்தது.

இந்த இராணுவப் புரட்சி வெற்றி பெறும் எனின்,  நிச்சயமாக மீண்டும் இஃவான்கள் பழைய நிலைக்குத் தள்ளப்படுவதற்கான வாய்ப்பு இருக்கின்றது. ஏனெனில் அந்தத் தேவை உள்நாட்டு சக்திகளுக்கு மாத்திரமன்றி சர்வதேச சக்திகளுக்கும் இருக்கின்றது. அவர்களை அடக்கி,  மீண்டும் தலையெடுக்க விடாமல் வைத்திருப்பதே அனைவருக்கும் பாதுகாப்பானது.

அல் இஃவான் அல் முஸ்லிமூன் இயக்கத்தின் உத்தியோக பூர்வ பேச்சாளர் கலாநிதி மஹ்மூத் கஸ்லான் அவர்கள் இராணுவத் தளபதி அப்துல் பத்தாஹ் ஸீ ஸீ யிற்கு எழுதிய கடிதம்.

கலாநிதி மஹ்மூத் கஸ்லான் 

பாகம் – 03

(இறுதிப் பகுதி)

தளபதி அவர்களே,

நீங்கள் மக்கள் விருப்பத்தை நிறைவேற்றும் வகையில்தான் இராணுவப் புரட்சிக்கு உந்தப்பட்டதாக தொடர்ந்தும் மக்களை நம்பவைக்க முயற்சி செய்து கொண்டிருக்கிறீர்கள், ஆனால் உண்மையில் அது இரவோடு இரவாக மேற்கொள்ளப்பட்ட ஒரு சதி என்பதை எல்லோரும் அறிவர்.

 அந்த செய்திகள் தற்போது பக்கம் பக்கமாக வெளிவரத் தொடங்கியுள்ளன, உங்களுக்கும் ஜப்ஹதுல் இன்காத் தலைமைகளுக்குமிடையில் நடைபெற்ற சந்திப்புகளில், அரசியல் வாதிகளும் ஊடகவியலாளர்களும் மக்களைத் திரட்டுவதாகவும், அப்போது நீங்கள் இராணுவப் புரட்சியை மேற்கொள்வதாகவும், தீர்மானிக்கப்பட்டுள்ளன.

 நிச்சயமாக இது புதிய விடயமல்ல, முகம்மத் அபூ ஹாமித் கூறியிருந்தார்,  கலாநிதி முர்ஸி அவர்கள் தேர்தலில் வெற்றி பெற்ற போது, அமெரிக்கத் தூதரகத்தின் உயர் அதிகாரி ஒருவர், ஒரு இலட்சம் பேரை ஜனாதிபதி மாளிகைக்கு முன்னால் திரட்ட முடியும் எனின் அவர்களை அமெரிக்கா அங்கீகரிக்கும் என்று தெரவித்ததாகக் கூறியுள்ளார்,  அத்துடன் அப்போதைய இராணுவத் தளபதி தன்தாவி, மக்களைத் திரட்டும் வேலை வெற்றியளிக்கும் எனின் தான் ஆட்சிக் கவிழ்ப்பை மேற்கொள்வதாக வாக்குறுதி வழங்கியிருந்தார்,  பரதாகி, அம்ர் மூஸா, ஸப்பாஹி ஆகியோருடன் நீங்கள் மேற்கொண்ட சந்திப்புகளின் இரகசியத்தை வோல் ஸ்ட்ரீட் ஜேர்னலில் காணலாம்.

அல் இஃவான் அல் முஸ்லிமூன் இயக்கத்தின் உத்தியோக பூர்வ பேச்சாளர் கலாநிதி மஹ்மூத் கஸ்லான் அவர்கள் இராணுவத் தளபதி அப்துல் பத்தாஹ் ஸீ ஸீ யிற்கு எழுதிய கடிதம்.

கலாநிதி மஹ்மூத் கஸ்லான் 

பாகம் - 02

கௌரவ தளபதி அவர்களே,

நீங்கள் உங்கள் நாட்டு மக்களையே கொலை செய்யுமாறு கட்டளை பிறப்பித்த போது உங்கள் உண்மையான முகம் வெளித்தெரிந்து விட்டது, அவர்கள் மிகவும் அமைதியாக தாம் தெரிவு செய்த ஜனாதிபதியை விடுவிக்குமாறு போராடிக் கொண்டிருந்தார்கள்.

 சுப்ஹ் தொழுகையில் ஈடுபட்டுக் கொண்டிருந்த உங்களது நாட்டு சகோதரர்களையே கொல்லுமாறு நீங்கள் சொன்ன போது,  உங்களது மிருகத்தன்மையும் இரத்த வெறியும் வெளிப்பட்டது,  அந்த சோக நிகழ்வில் ஜம்பதுக்கும் மேற்பட்டோர் கொல்லப்பட்டார்கள்,  நூற்றுக் கணக்கானோர் காயப்பட்டார்கள், இன்னும் பலர் கைது செய்யப்பட்டு மிக மோசமாக நடாத்தப்பட்டார்கள்,  எந்தளவுக்கு எனின் ஒரு படைவீரர் ஒரு கைதியின் கழுத்தில் தனது சப்பாத்தை வைத்து மிதித்ததைப் பார்த்தோம்.

 ஆர்ப்பாட்டக் காரர்களுக்கு அச்சத்தை ஏற்படுத்தி விடலாம் என்றுதானே,  இவை அனைத்தும் செய்யப்பட்டன,  ஆனால்,  நீங்கள் தெரிந்து கொள்ளுங்கள் எகிப்து மக்கள் பயத்தை மறந்து விட்டார்கள்,  அவர்களது சுதந்திரம் உயிரை விடவும் பெறுமதியானது என நம்புகிறார்கள்,  இனி ஒருபோதும் அவர்கள் இழிவடைய மாட்டார்கள்.

அல் இஃவான் அல் முஸ்லிமூன் இயக்கத்தின் உத்தியோக பூர்வ பேச்சாளர் கலாநிதி மஹ்மூத் கஸ்லான் அவர்கள் இராணுவத் தளபதி அப்துல் பத்தாஹ் ஸீ ஸீ யிற்கு எழுதிய கடிதம்.

கலாநிதி மஹ்மூத் கஸ்லான் 

பாகம் - 01

கௌரவ தளபதி அவர்களே,

நீங்கள் உங்கள் படையினரில் ஒரு பிரிவினரை பக்கபலமாக வைத்துக் கொண்டு, சட்டபூர்வமான ஜனாதிபதி முகம்மத் முர்ஸி அவர்களை எதிர்க்கத் தலைப்பட்டு விட்டீர்கள், இது, ஒரு மனிதராக நீங்கள் செய்யக்கூடாத ஒரு விடயம் என நான் நினைக்கிறேன்.

  பல நூற்றுக் கணக்கான இராணுவத் தலைவர்கள் இருக்கையில் இவர்தான் உங்களைத் தெரிவு செய்தார்,  பாதுகாப்பு அமைச்சராகவும் இராணுவத் தளபதியாகவும் உங்களை நியமனம் செய்தார்,  உங்களது தரத்தை உயர்த்தி உங்கள் மீது நம்பிக்கையும் வைத்தார்,  அரசாங்கத்திற்கு விசுவாசமாக இருப்பதாகவும் சட்டத்தையும் யாப்பையும் மதித்து நடப்பதாகவும் நீங்கள் சத்தியப் பிரமாணம் செய்தீர்கள்.

  இந்த அனைத்திற்கும் நீங்கள் மாறு செய்து விட்டீர்கள்,  சத்தியத்தை முறித்து விட்டீர்கள்,  அரசுக்கு துரோகமிழைத்து விட்டீர்கள், அல்லாஹ்தஆலா கூறுகிறான் " நீங்கள் அல்லாஹ்வை முன்னிறுத்தி செய்து கொண்ட உடன்படிக்கைகளை நிறைவேற்றுங்கள்,  சத்தியங்களை முறிக்காதீர்கள்,  உங்களுக்குப் பொறுப்பாக நீங்கள் அல்லாஹ்வையே வைத்திருந்தீர்கள்,  நீங்கள் செய்பவற்றை அவன் நன்கறிவான் ( நஹ்ல் - 91)

நீங்கள் ஜனாதிபதியை பதவி நீக்கம் செய்துவிட்டீர்கள்,  அவரைக் கைதுசெய்து மறைத்து வைத்து விட்டீர்கள்,  பின்னர், உங்கள் இராணுவத்தில் சிலரை ஒன்றுகூட்டி, அவர் பற்றி பிழை சொல்லத் தொடங்கினீர்கள்,  அவர் எந்தவகையிலும் சம்பந்தமேயில்லாத குற்றச் சாட்டுகளை அவர் மீது சுமத்தினீர்கள்.

ரமழானில் கணவனும் மனைவியும்

 - மூன்று ஆலோசணைகள் -

முதலாவது ஆலோசணை :

இபாதத்களில் இருவரும் இணைந்து ஈடுபடுங்கள்,  அதிலும் குறிப்பாக இரவுத் தொழுகையை இருவரும் இணைந்து நிறைவேற்றுங்கள், தினமும் குறைந்தது இரண்டு ரக்அத்களேனும் தொழுவதற்கு நேரம் எடுத்துக் கொள்ளுங்கள்.

உங்களுக்குத் தெரியுமா?  கணவன் மனைவியரிடையே பிணைப்பையும் நெருக்கத்தையும் புரிந்துணர்வையும் ஏற்படுத்துவதில் இபாதத்களைப் போல் வேறு எந்த செயலும் பங்களிக்க முடியாது.

அல்லாஹ்தஆலா அல்குர்ஆனில் கூறுகிறான் : "உங்களது மனைவியரையும் தொழுமாறு கட்டளையிடுங்கள்,  இந்த விடயத்தில் மிகவும் பொறுமையுடன் நடந்து கொள்ளுங்கள்" ( தாஹா – 132) என்கிறான்.

இந்த வசனத்தில் வீட்டினுள்ளே இபாதத் சூழல் பேணப்பட வேண்டியதன் முக்கியத்துவம் வலியுறுத்தப்படுவதைக் காணலாம். இதற்கான காரணம் என்ன என்று நினைக்கிறீர்கள்?  வீட்டினுள்ளே ஆன்மீக சூழல் மேலோங்கியிருத்தல் என்பது,  குடும்ப உறவு பலமடைவதற்கான ஒரு முக்கிய காரணியாகும்.

சௌகரியமான எல்லையிலிருந்து விடுபடல் - Comfort zone -

ரமழான் மாதம் எங்களை வந்தடைந்திருக்கிறது. எத்தனையோ பல செய்திகளைச் சுமந்து வந்திருக்கிறது. அந்த செய்திகளில் ஒன்றை உங்களுடன் கொஞ்சம் பரிமாறிக் கொள்ளலாம் என்று நினைக்கிறேன்.

ரமழான் மாதம் பற்றியும், நோன்பு நோற்றல் பற்றியும் வந்துள்ள அல்-குர்ஆன் வசனங்கள்,  ஹதீஸ்களில் பார்வையைச் செலுத்துகின்ற பொழுது,  பொதுவாக உள்ளத்துடனான போராட்டத்திற்கே முக்கியத்துவம் தருவதைக் காணலாம். அதாவது,  உள்ளத்தை அசைத்து,  குளுக்கி,  கழுவி,  துடைத்து,  தட்டி,  நசுக்கி,  பழுதுபார்க்கும் ஒரு வேலை முக்கிய நோக்கமாகக் கொள்ளப்பட்டிருப்பதைக் காணலாம்.

அல்-குர்ஆன் தக்வாவை வரவழைப்பது பற்றிப் பேசுகிறது. ஒரு ஹதீஸ் மனிதனது இச்சையைக் கட்டுப்படுத்துவது பற்றிப் பேசுகிறது. இந்த நோக்கத்தை வலியுறுத்தும் வகையில் உணவும் பாணமும் உடல் உறவும் பகல் பொழுதுகளில் தடைசெய்யப்பட்டுள்ளன, குறைவான தூக்கமே வலியுறுத்தப்பட்டுள்ளது. அதிகமான இபாதத்கள் தூண்டுதல் அளிக்கப்பட்டுள்ளன.

உள்ளத்திற்கு இங்கு ஒரு வன்மையான பயிற்சி அளிக்கப்படுகிறது. தான் விரும்புகின்ற விடயங்கள் தடை செய்யப்படுகின்றன. விரும்பாத விடயங்களை வலிந்து செய்ய வேண்டி ஏற்படுகிறது. இதுதான் ஒரு மனிதனது சௌகரியமான எல்லைக்கு – Comfort zone - சவால் விடுக்கின்றது.

சௌகரியமான எல்லைக்குள் வாழுதல் என்பது,  இன்று மனித நடத்தை குறித்துப் பேசப்படுகின்ற ஒரு முக்கிய பிரச்சினையாகும். முகாமைத்துவ கலையும், தர்பிய்யத் கலையும் இதனை வெகுவாகப் பேசியிருக்கின்றன. ஒரு நிறுவனத்திலோ அல்லது எந்த இடத்திலோ இந்த சௌகரியமான எல்லையை தனக்கு சிருஷ்டித்துக் கொள்கின்ற ஒருவர்,  மாற்றங்களுக்குச் செல்ல மாட்டார்,  முன்னேற்றத்தில் அக்கறை கொள்ள மாட்டார்,  புதியவைகளை விரும்ப மாட்டார்,  சுயநலத்தை முற்படுத்துவார். மொத்தத்தில் அந்த நிறுவனத்தின் அல்லது அந்தப் பணியின் தோல்விக்குக் காரணமாக இருப்பார்.

இத்தகைய ஒரு மனித நடத்தையை சீர்செய்வதற்கான சிறந்த மருந்து,  உள்ளத்திற்கு வழங்கப்படுகின்ற சற்று வன்மையான தர்பிய்யத்தாகும்.

இஸ்லாம் இந்த தர்பியத்தை வருடம் தோறும் ஒரு மாத காலத்திற்கு கட்டாயமான ஒரு பயிற்சி நெறியாக முஸ்லிம் உம்மத்திற்கு வழங்கிக் கொண்டிருக்கிறது. ரமழான் மாதத்தின் சாதாரணமான வாழ்வொழுங்கைப் பாருங்கள்,  உணவு நேரசூசி மாறுகிறது,  உறங்கும் நேரசூசி மாறுகிறது,  ஏன்? மலசலம் கழிக்கும் நேரசூசி கூட மாறுகிறது,  இந்த மாற்றம் மனிதனில் நிர்பந்தமாய் ஏற்படுத்தப்படுகிறது. அவனை அவனது சௌகரியமான எல்லையில் இருந்து வெளியே கொண்டு வந்து விடுகிறது. இது ரமழான் முழு முஸ்லிம் உம்மத்திற்கும் வழங்குகின்ற ஒரு உன்னதமான தர்பிய்யத்,  அதனால்தான்,  முஸ்லிம் உம்மத் என்றும் மாற்றமுறும் உம்மத்தாகவும்,  முன்னேற்றமடையும் உம்மத்தாகவும்,  புதுமைகளைக் காணும் உம்மத்தாகவும், சுயநலமற்ற உம்மத்தாகவும் இருக்கின்றது.

இந்த வருட ரமழானை சௌகரியமான எல்லையில் – Comfort zone -  வாழுதல் என்ற தவறிலிருந்து எம்மை மாற்றிக் கொள்வதற்கான ஒரு சந்தர்ப்பமாக பயன்படுத்திக் கொள்வோம். அல்லாஹ் எம்மை அங்கீகரிக்கட்டும்.